Қазіргі таңда Шымкент қаласында қоғамдық тәртіпті сақтау, құқықтық сауаттылықты арттыру және тұрғындардың құқық бұзушылықтарға қарсы иммунитетін күшейту бағытында бірқатар нақты шаралар іске асырылуда. Бұл шаралар – «Құқықтық сананың деңгейін арттыру» мемлекеттік бағыты аясында, сондай-ақ «Таза Қазақстан» экологиялық акциясы мен «Заң мен тәртіп» тұжырымдамасы негізінде жүзеге асырылып отыр.
Жуырда Шымкент қаласының прокуратурасы мен құқық қорғау органдарының қатысуымен өткен жалпықалалық сенбілік тек санитарлық тазалықпен шектелмей, құқық бұзушылықтардың да алдын алуға бағытталған үлгілі іс-шараға айналды. Бұл сенбілік барысында арнайы ұйымдастырылған «Тазалық сақшылары» тобы өздерінің қырағылығы мен азаматтық белсенділігін танытып, көпқабатты үйлердің бірінің маңынан есірткі заттарын насихаттайтын жазбаларды байқап қалды.
Азаматтар тарапынан жедел берілген ақпарат негізінде, прокуратураның үйлестіруімен полиция қызметкерлері заңсыз үгіт-насихатқа қатысы бар күдіктіні қолға түсірді. Ұсталған азамат уақытша ұстау изоляторына қамалып, оның үстінен Қазақстан Республикасы Қылмыстық кодексінің 299-1-бабы бойынша (есірткі құралдарын насихаттау немесе заңсыз жарнамалау) сотқа дейінгі тергеп-тексеру басталды.
Мұндай заң бұзушылықтар тек есірткіге қарсы күрестің емес, жалпы құқықтық сана мен азаматтық жауапкершіліктің әлсіздігін көрсетеді. Бұл ретте мемлекеттік органдар мен қоғам бірлесе әрекет етуі қажет. Халық арасында жалған ақпарат таратудың, қаржылық пирамидалар мен интернет-алаяқтықтың, сондай-ақ лудомания мен суицидтік тенденциялардың таралуының алдын алу – құқық қорғау органдарының ғана емес, әрбір азаматтың парызы.
«Тазалық сақшылары» жобасы осы тұрғыдан алғанда – құқықтық тәртіпті қалыптастыруда халық пен билік арасындағы тиімді байланыстың көрінісі. Бұл бастама қоғамның қауіпсіздігіне бейжай қарамайтын азаматтардың бар екенін дәлелдеді. Прокуратура бұл жобаны әрі қарай дамыту және өзге де қауіптің көзін ерте анықтап, алдын алу жолдарын қалыптастыру мақсатында кеңінен қолдап отыр.
Шымкент қаласының прокуратурасы барлық тұрғындарды белсенді азаматтық ұстаным танытуға шақырады. Егер сіз есірткі, заңсыз ойын бизнесі, жалған ақпарат тарату немесе интернет арқылы алаяқтық секілді фактілерге куә болсаңыз, дереу құқық қорғау органдарына хабарласыңыз. Бұл – тек өзіңіздің ғана емес, бүкіл қоғамның қауіпсіздігін қамтамасыз етуге қосқан үлесіңіз.
Құқықтық сауатты, белсенді және жауапты қоғам құру – баршамыздың ортақ міндетіміз. Қаламыздың таза, қауіпсіз және құқықтық тәртіпке негізделген болашағы – біздің қырағылығымыз бен бірлескен күш-жігерімізге тікелей байланысты.
