Қостанай облысында пара және сурдо спортпен айналысатын азаматтардың қатары жылдан жылға артып келеді. Бүгінде олардың саны 300-ге жуықтап, өңірде мүмкіндігі шектеулі жандардың спортқа бет бұру үрдісі тұрақты қалыптасқан. Бұл – ел ішіндегі әлеуметтік қолдаудың, ерік-жігері күшті азаматтардың және кәсіби мамандардың нәтижелі еңбегінің айғағы.
Олардың арасында әлемдік деңгейде ел намысын қорғап, жүлделі орындарға ие болып жүрген спортшылар да бар. Бұл – тек спорт емес, ұлт рухының биіктігі, тең мүмкіндіктер қоғамының шынайы көрінісі.
Соңғы жылдары өңірде ерекше қажеттіліктері бар балаларды жүзуге баулу ісі ерекше қарқын алған. Осы бағытта жұмыс істейтін мамандандырылған жаттықтырушылар мен бейімделген бассейндер бар. Үш жыл бұрын салынған заманауи жүзу бассейні бүгінде кәсіби спортшылармен қатар, мүгедектігі бар балаларға да есігін айқара ашты. Олар аптасына 4 күн суда жаттығып, өз дағдыларын жетілдіруде.
Татьяна Борисенко есімді жаттықтырушы 7 жастан 18 жасқа дейінгі балалардан құралған топпен жұмыс істейді. Ол пара спортқа ден қойған, яғни аяқ-қолы кеміс немесе көру қабілеті нашар балаларды жаттықтырады. Жеті жылдан бері мүгедек балалармен жұмыс істеп келе жатқан тәжірибелі бапкер:
“Біз оларды мүгедек деп қарамаймыз. Әрқайсысына жеке әдіс қолданып, мақсатқа ұмтылдырамыз. Тек денсаулығын жақсартуға емес, үлкен жетістіктерге жетуге бағыт береміз”, – дейді.
Басқа бір топта – сурдо спортшылар, яғни есту қабілеті төмен балалар. Оларды Екатерина Бодрова есімді бапкер жаттықтырады. Ол жаттығу кезінде ым-ишара тілін пайдалана отырып, балалармен өзара түсіністік орната біледі. Оның шәкірттері жуырда өткен республикалық жарыста 15 медаль жеңіп алып, зор қуаныш сыйлаған. Ал Мария Сотникова есімді спортшысы биыл Токиода өтетін Сурдлимпиада ойындарына жолдама жеңіп алған.
“Бастысы – ым тілін білу. Балалар өздері де үйретіп отырады. Олар өте сезімтал. Қимылымнан не айтқым келгенін бірден түсінеді”, – дейді Екатерина.
Қостанай облыстық мүгедектер спорт клубында 32 бапкер қызмет етеді. Олар 27 спорт түрінен жаттығу жүргізеді. Клубтың басшысы Абзал Уәлиевтің айтуынша, бұл салада жұмыс істеу – үлкен жүрек пен төзімділікті қажет етеді.
“Біздің клубқа кез келген адам келіп, жұмыс істей алмайды. Жүрегі жұмсақ, мейірімді адам болуы керек. Қазір біз 19 спорт нысанында жаттығамыз. Соның 17-сі тегін, ал **екеуін жалдап отырмыз”, – дейді ол.
Облыс басшылығы тарапынан мүгедектігі бар азаматтарға арнап жеке спорт базасы салынатыны айтылған. Мұндай орталық ашылса, бұл – клубтың жұмысын жаңа деңгейге көтеріп, ерекше жандарға жасалған үлкен қолдау болмақ.
Қостанайдағы пара және сурдо спорт – бұл жай ғана спорттық бағыт емес. Бұл – үміт пен сенім, жігер мен қайсарлық, теңдік пен табандылық символы. Ерекше жандардың өмірге деген құштарлығы, спорт арқылы шынайы жеңістерге жетуі – қоғам үшін үлкен үлгі.
Осы бастамалардың жалғасып, еліміз бойынша кең көлемде дамуына тілектеспіз. Спорт – бәріне ортақ, ал жеңіс – табандыларға тиесілі.
