Қазақ шахматының жұлдызы жаңа белеске көтерілді. 21 жастағы халықаралық гроссмейстер, Азия чемпионы Бибісара Асаубаева Шарджада өткен беделді Sharjah Masters-2025 турнирінде керемет нәтиже көрсетіп, өзінің үшінші гроссмейстерлік нормасын орындады. Осылайша, ол әйелдер арасындағы екінші қазақстандық гроссмейстер атануға ресми түрде үміткер болып отыр.
FIDE (Халықаралық шахмат федерациясы) рейтингінде алғаш рет 2500 межеден асып, тарихи көрсеткішке қол жеткізген Бибісара әлемдік шахмат аренасындағы өз орнын тағы бір мәрте дәлелдеді. Ол жарысты үздік отыздықтың қатарында аяқтап, әйелдер арасында ең жоғары нәтижеге қол жеткізді.
Sharjah Masters – шахмат әлеміндегі ең беделді супертурнирлердің бірі. Бұл додада әлемнің үздік шахматшылары бақ сынайды. Асаубаева әйелдер Гран-приінің жеңімпазы Қытайдан келген Чжу Цзиньэр мен шахмат Олимпиадасының чемпионы үндістандық Дивья Дешмухты айқын артта қалдырды. Бұл – халықаралық деңгейдегі ірі жетістік.
Бибісара осы жетістігімен қазақстандық әйелдер шахматы тарихындағы екінші гроссмейстер болуға жақын. Бұған дейін бұл атақты тек Жансая Әбдумәлік еншілеген еді. Енді Асаубаева да сол элиталық қатарға қосылмақ.
Гроссмейстер атағы – шахматтағы ең жоғары деңгейдегі халықаралық титулдардың бірі. Оны алу үшін спортшы бірнеше жыл бойы үздіксіз жоғары нәтиже көрсетуі керек, түрлі халықаралық жарыстарда белгілі бір нормативтерді орындауы тиіс. Бибісара бұл жолды табандылықпен жүріп өтті.
Бибісараның бұл жетістігі – тек жеке жеңіс емес, Қазақстан шахматы үшін үлкен серпіліс. Соңғы жылдары елімізде шахмат дамуына ерекше көңіл бөлініп келеді. Балалар мен жастар арасында шахмат үйірмелері көбейіп, халықаралық деңгейдегі жарыстарға қатысушылар саны артты.
Асаубаеваның жеңісі жас буынға шабыт беріп, еліміздегі шахмат мәдениетін жаңа деңгейге көтереді. Ол тек спортшы ғана емес, еліміздің интеллектуалды символдарының біріне айналуда.
FIDE кеңесінің алдағы отырысында Бибісара Асаубаеваның гроссмейстер атағы ресми түрде бекітіледі деп күтілуде. Бұл – Қазақстан үшін мақтаныш, ал шахматшы үшін жаңа мүмкіндіктердің бастауы.
«Мен үшін шахмат – өмірдің бір бөлігі. Әр партия – ой, жоспар, сезім және күрес. Гроссмейстер атану – үлкен арманым болатын. Бірақ бұл тек бастамасы», – дейді Бибісара өз сұхбатында.
