Шымкент қаласында құқықтық мәдениетті дамыту мен «Заң мен Тәртіп» тұжырымдамасын іске асыру бағытында нақты іс-шаралар жүйелі түрде жүргізілуде. Соның айқын көрінісі – 3 қазан күні Әл-Фараби алаңында өткен «Жолда қабылдау» республикалық акциясы. Бұл шараның басты мақсаты – тұрғындардың құқықтық сауаттылығын арттыру, полиция мен қоғам арасындағы өзара сенімді нығайту және өзекті мәселелерді дер кезінде шешуге мүмкіндік беру.
Акция таңғы сағат 09:00-ден кешкі 18:00-ге дейін жалғасып, Шымкент қаласы Полиция департаментінің түрлі басқармаларының қызметкерлері жүзге жуық азаматты жеке қабылдады. Тұрғындар көлік қозғалысы ережелері, тұрғын үй қауіпсіздігі, интернет алаяқтық, тұрмыстық зорлық-зомбылықтың алдын алу және құжаттандыру мәселелері бойынша өз сұрақтарына нақты жауап алып, кәсіби құқықтық кеңеске ие болды.
Мұндай кездесулердің ерекшелігі – азаматтардың мәселелерін тек қағаз жүзінде емес, сол жерде шешуге мүмкіндік берілуі. Әсіресе, жол қозғалысы қауіпсіздігі, әкімшілік айыппұлдар, көлік тіркеу және жүргізуші куәлігін алу сияқты өзекті тақырыптар көп талқыланды. Полиция қызметкерлері тұрғындарға жол-көлік оқиғаларының алдын алу және заң бұзушылықтың салдарын түсіндіріп, құқықтық мәдениетті сақтаудың маңызын атап өтті.
«Жолда қабылдау» акциясы — бұл полиция мен халық арасындағы ашық диалогтың тиімді алаңы. Ол «Заң мен Тәртіп» қағидатын қоғамда орнықтыруға, азаматтардың құқықтық санасын арттыруға және сенімді қарым-қатынас орнатуға бағытталған.
Акция барысында көптеген азаматтар интернет алаяқтық пен жалған ақпарат мәселесін көтерді. Полиция өкілдері мұндай жағдайларда тек ресми дереккөздерге сенуге және күмәнді сілтемелер мен телефон қоңырауларына жауап бермеуге шақырды. «Құқықтық сана деңгейі жоғары қоғамда ғана тұрақтылық пен қауіпсіздік қамтамасыз етіледі», – дейді Шымкент қаласы Полиция департаментінің өкілдері.
Айта кетейік, акция 4 қазан күні Арбат аллеясында өз жалғасын табады. Сонымен қатар, іс-шараға қатыса алмаған тұрғындар үшін 8 (700) 111 30 44 нөмірі арқылы онлайн байланыс ұйымдастырылған. Бұл бастама тұрғындардың полициямен ашық және қолжетімді байланыс орнатуына мүмкіндік береді.
Шымкент қаласында мұндай акциялар жиі өткізіліп тұрады. Себебі, құқықтық санасы жоғары қоғам – заңға бағынатын, қауіпсіз және тұрақты қоғамның кепілі. Әрбір азамат өз құқығы мен міндетін біліп, қоғамдық тәртіпті сақтауға үлес қосса, қаладағы «Заң мен Тәртіп» қағидаты толық жүзеге аспақ.
