2025 жылғы 6 тамыз күні Шымкент қаласы Ішкі саясат және жастар істері жөніндегі басқармасының «Жастар ресурстық орталығы» коммуналдық мемлекеттік мекемесінің ұйымдастыруымен Құрсай шағынауданындағы Әл-Фараби атындағы мектепте ата-аналар мен педагогтарға арналған «Қауіпсіз қала» тақырыбында кездесу өтті.
Іс-шараның басты мақсаты – кәмелетке толмағандардың түнгі уақытта заңсыз және бейберекет жүруінің алдын алу, олардың құқықтық сауаттылығын арттыру, сондай-ақ ата-аналар мен білім беру мекемелері арасындағы өзара іс-қимылды нығайту.
Кездесуге Шымкент қаласы Полиция департаменті Жергілікті полиция қызметі басқармасы Патрульдік полиция полкінің әкімшілік практика тобының аға инспекторы, полиция капитаны Асылхан Әбдіқалық, Тұран аудандық полиция басқармасы ЖПҚБ бастығының орынбасары, полиция капитаны Құдайберген Төлегенұлы Бегімбетов және «Жастар ресурстық орталығы» КММ Аутрич және NEET санатындағы жастармен жұмыс жүргізу бөлімінің инспекторы Заңғар Ғаниұлы қатысты.
Спикерлер өз баяндамаларында кәмелетке толмағандардың түнгі мезгілде ата-анасының немесе заңды өкілінің ертіп жүруінсіз көшеде, ойын-сауық орындарында болуы Қазақстан Республикасының заңнамасына қайшы екенін нақты түсіндірді. Мұндай жағдайлар үшін ата-аналарға Әкімшілік құқықбұзушылық туралы кодекстің тиісті баптары бойынша айыппұл салынатыны атап өтілді.
Іс-шара барысында ата-аналарға балалардың бос уақытын тиімді ұйымдастыру, олардың интернеттегі қауіпсіздігін қамтамасыз ету, жалған ақпарат пен әлеуметтік желілердегі арбау әрекеттеріне қарсы тұру жолдары түсіндірілді. Бұл бағытта медиа сауаттылықты дамытуға ерекше назар аударылды. Спикерлер балаларға онлайн және оффлайн ортада қауіп төндіретін факторлар туралы, сондай-ақ оларды ерте анықтау әдістері жайында нақты мысалдар келтірді.
Кездесуде педагогтар мен тәртіп сақшылары арасындағы байланыс арналарын жетілдіру мәселесі де көтерілді. Мұғалімдер кәмелетке толмағандар арасындағы құқықбұзушылық фактілерін уақтылы анықтап, полицияға хабарлау тетіктерін білуі тиіс. Бұл балаларды қылмыстық ортаға тартудың алдын алу үшін маңызды.
Мамандардың айтуынша, құқықтық сауаттылық тек заңдарды білу ғана емес, сонымен бірге оларды күнделікті өмірде сақтау дағдысын қалыптастыру болып табылады. Ата-аналар мен педагогтар бұл бағытта үлгі бола отырып, балаларға тәртіп пен жауапкершілік құндылықтарын сіңіруі керек.
«Қауіпсіз қала» жобасы аясында мұндай кездесулер тұрақты түрде өткізіліп, ата-аналар мен мұғалімдерге арналған тренингтер, құқықтық кеңестер және ақпараттық буклеттер тарату жоспарланған. Бұл тек қана құқықбұзушылықтың алдын алу емес, сондай-ақ азаматтардың заң алдындағы жауапкершілігін арттыруға бағытталған кешенді жұмыс болып саналады.
