Бүгінгі таңда Шымкент қаласында құқықтық сананы арттыру, жалған ақпараттың таралуына тосқауыл қою, интернет-алаяқтыққа және қаржылық пирамидаларға қарсы күрес, лудомания мен қоғамдағы суицидтік көңіл-күйдің алдын алу, сондай-ақ терроризм мен экстремизм қаупіне қарсы іс-қимыл негізгі басым бағыттардың бірі болып отыр. Бұл шаралар тұрғындардың құқықтық сауаттылығын арттырумен қатар, олардың қауіпсіздігін қамтамасыз етуге және қоғамдық тұрақтылықты нығайтуға бағытталған.
Шымкент қаласы Полиция департаменті қала әкімі аппаратының терроризмге қарсы күрес жөніндегі комиссиясы қызметін қамтамасыз ету бөлімінің мамандарымен бірлесіп, көлік инфрақұрылымы объектілерінің басшыларымен маңызды кездесу өткізді. Кездесу «Террористік тұрғыдан осал объектілерді терроризмнен қорғау» тақырыбында өтті.
Шара барысында автомобиль көлігі саласында қызмет атқаратын мекемелердің қауіпсіздік талаптары егжей-тегжейлі түсіндірілді. Мамандар жарылғыш құрылғыны немесе қауіпті затты анықтауға мүмкіндік беретін белгілерді таныстырып, мұндай жағдай орын алғанда персоналдың және жауапты қызметкерлердің іс-қимыл алгоритмін пысықтады. Сонымен қатар, көлік инфрақұрылымы нысандарын бейнебақылау жүйелері арқылы қалалық Полиция департаментінің Жедел басқару орталығымен интеграциялау мәселелері талқыланды.
Бұл бағыттағы жұмыстар тек терроризм қаупін азайтуға ғана емес, жалпы құқықтық мәдениетті арттыруға да септігін тигізеді. Полиция департаменті жүйелі түрде ақпараттық-түсіндіру кездесулерін, оқыту тренингтерін және қауіпсіздік жаттығуларын ұйымдастырып келеді.
Сонымен қатар, Шымкентте жалған ақпарат пен халықтың санасын манипуляциялауға қарсы шаралар да күшейтілген. Арнайы медиа-мониторинг тобы әлеуметтік желілер мен мессенджерлердегі ақпарат ағындарын қадағалап, жалған және арандатушылық сипаттағы хабарламаларды анықтайды. Бұл тек ақпараттық қауіпсіздікті қамтамасыз етіп қана қоймай, қоғамдағы тұрақтылықты сақтауға да ықпал етеді.
Қаржылық пирамидалар мен интернет-алаяқтыққа қарсы күрес – тағы бір маңызды бағыт. Құқық қорғау органдары күдікті инвестициялық жобаларды дер кезінде анықтап, азаматтарға қаржылық қауіпсіздік бойынша түсіндірме жұмыстарын жүргізуде. Ал жәбірленушілерге тегін құқықтық кеңес беріледі.
Жастар арасында лудомания мен суицидтік тәуекелдің алдын алу да өзекті мәселе болып отыр. Білім беру мекемелерінде психологтар мен әлеуметтік қызметкерлердің қатысуымен арнайы кездесулер өткізіліп, психологиялық қолдау бағдарламалары енгізілуде. Бұл шаралар жас буынның өмірлік дағдыларын қалыптастыруға, саналы таңдау жасауына және қиындықтармен күресе алуына көмектеседі.
Осы кешенді шаралардың барлығы Шымкент қаласының тұрғындары үшін қауіпсіз, тұрақты және құқықтық орта қалыптастыруға бағытталған. Қоғам мен құқық қорғау органдарының бірлескен жұмысы – бұл бағыттағы табыстың негізгі кепілі. Алдағы уақытта да мұндай іс-шаралар жүйелі түрде жалғасын табатыны сөзсіз.
