Шымкент қаласында Үкіметтік емес ұйымдармен және қоғаммен өзара іс-қимыл жөніндегі кеңес 2025 жылдың алғашқы жартыжылдығындағы жұмысын қорытындылады. Кеңестің басты мақсаты – қоғамды, әсіресе жастарды есірткі қатерінен қорғау, құқықтық сананы арттыру және тұрғындар арасында салауатты өмір салтын насихаттау бағытында мемлекеттік құрылымдар, азаматтық сектор мен жастар бастамаларының күшін біріктіру.
Кеңес құрамына 14 адам енген: қоғамдық ұйым өкілдері, мәслихат депутаттары, спортшылар, есірткі қылмысына қарсы іс-қимыл және нашақорлықтың алдын алу саласындағы мамандар, танымал блогерлер, журналистер және өз саласында беделді медиа тұлғалар. Мұндай көпсалалы құрам қоғамдағы түрлі топтармен тиімді байланыс орнатуға мүмкіндік береді.
Кеңес құрылған сәттен бастап қала бойынша бірқатар ауқымды іс-шараның үйлестірушісі әрі ұйымдастырушысы болды. Мектептерде, колледждер мен жоғары оқу орындарында жүйелі түрде алдын алу дәрістері, семинарлар мен кездесулер өткізіледі. Бұл кездесулерде жастарға есірткінің зияны жайлы ғылыми деректер мен нақты өмірлік мысалдар ұсынылады. Сонымен қатар, қатысушыларға балама өмір жолдары – спортпен шұғылдану, патриоттық қозғалыстарға қосылу, шығармашылық жобаларға қатысу мүмкіндіктері таныстырылады.
Кеңес жастар жобалары мен бастамаларын белсенді қолдайды. «Спорт есірткіге қарсы» ұранымен жарыстар, патриоттық және экологиялық акциялар өткізілді. Сонымен бірге, есірткіге қарсы бейнероликтер түсіріліп, мектеп оқушылары, студенттер мен әскери қызметшілердің қатысуымен 10-нан астам жаппай шара ұйымдастырылды. Бұл жобалар жастардың бойында жауапкершілік, қайсарлық және өз болашағына деген сенімділікті қалыптастырады.
Қоғамдық ұйымдармен бірлесіп, қала аумағында есірткі жарнамасы бар граффитилерді бояу акциялары өтті. Шара барысында 200-ден астам заңсыз жазба жойылды. Бұл тек визуалды үгітке қарсы күрес емес, сонымен қатар қылмыстық идеологияға төзбеушіліктің және таза, қауіпсіз ортада өмір сүруге ұмтылыстың айқын көрінісі болып отыр.
Кеңес жұмысының маңызды бағыты – тұрғындардың құқықтық мәдениетін арттыру. Шымкент қаласының Полиция департаментімен бірлесе отырып, жастарға заңды білу мен сақтау қажеттілігі түсіндіріледі. Әсіресе, әлеуметтік желілерде таралатын жалған ақпараттың зияны жайлы ескерту жасалады. Жалған немесе тексерілмеген мәліметтер кейде адамдарды қате қадамдарға итермелеуі мүмкін, сондықтан ақпараттың ресми дереккөздерден алынуы аса маңызды.
Кеңес мүшелері сондай-ақ бұқаралық сананы арбау әрекеттеріне қарсы күрес тәсілдерін талқылайды. Бұл бағытта медиа сауаттылықты дамытуға арналған тренингтер өткізіледі, жастарға жалған ақпаратты тану дағдылары үйретіледі.
Кеңес қызметі – бұл тек профилактика емес, сондай-ақ азаматтардың өзара жауапкершілігін арттыру, әрбір шымкенттіктің қауіпсіздік пен бейбітшілікке үлес қосуына жол ашу. Жылдың екінші жартысында да осындай бағыттағы іс-шаралар жалғасын табады.
