Шымкент қаласындағы №2 қалалық аурухананың нейрохирургия бөлімшесінде 73 жастағы науқасқа бір мезетте бірнеше күрделі операция жасалды. Бұл аса күрделі медициналық процедура жоғары білікті нейрохирург Еркін Медетовтың жетекшілігімен сәтті жүзеге асырылды. Операция заманауи микрохирургия әдісін қолдану арқылы өткізілді, бұл Шымкенттегі озық технологиялармен жасалатын сирек хирургиялық емдеу түріне жатады.
Әуелі, дәрігерлер микрохирургиялық жабдықтың көмегімен науқастың миында анықталған үлкен ісікті сәтті алып тастады. Одан кейін омыртқааралық диск жарығын жою және омыртқаны бекіту операциялары жүргізілді. Мұндай көпқырлы ота нейрохирургия саласында жоғары мамандануды және ең жаңа медициналық технологияларды қолдануды талап етеді. Операциялар сәтті аяқталып, науқас қазір қалпына келтіру кезеңінде дәрігерлердің тұрақты бақылауында.
№2 қалалық аурухананың нейрохирургия бөлімшесі өңірде жоғары деңгейдегі мамандандырылған хирургиялық көмектің орталығы болып саналады. Бөлімше ашылғаннан бері 100-ден астам науқасқа әртүрлі күрделі операция жасалған, оның ішінде көлемді ми ісіктерін жою, ми тамырларындағы аневризмаларды емдеу және омыртқа патологияларына арналған хирургиялық емдер бар. Аурухананың заманауи жабдықталуы мен тәжірибелі дәрігерлердің арқасында мұндай күрделі оталар сапалы әрі тиімді орындалуда.
Сонымен қатар, барлық медициналық қызметтер тұрғындарға міндетті әлеуметтік медициналық сақтандыру және медициналық көмектің кепілдік көлемі шеңберінде қолжетімді. Бөлімшенің қызметтері қала тұрғындарына сапалы ем алу үшін кең мүмкіндіктер ұсынып, денсаулық сақтау саласындағы маңызды жетістіктердің біріне айналды.
