Шымкент қаласының әкімі қаладағы маңызды нысандарды аралап, тұрғындардың өмір сапасын жақсартуға бағытталған жаңа жобалардың жүзеге асырылу барысымен танысты. Әкімнің назарында қаладағы гүлзарлар құрылысы, көпқабатты үйлердің сапасы, коммуналдық инфрақұрылым және қауіпсіздік мәселелері болды.
Алдымен, әкім «Нұрсат-2» шағынауданында демеушілердің қолдауымен салынып жатқан жаңа гүлзарды тексерді. Құрылыс жұмыстары қараша айының соңына дейін аяқталады деп жоспарланған. Әкім мердігерлерге көгалдандыруды басты назарда ұстауды, сондай-ақ, мүмкіндігі шектеулі азаматтарға ыңғайлы және қауіпсіз жағдай жасауды ескертті.
Әрі қарай, әкім «Асар-2» шағынауданындағы көпқабатты тұрғын үйлердің құрылысымен танысты. Құрылысшыларға сапа стандарттарын сақтау және сенімді материалдарды қолдану жөнінде тапсырма берілді. Қала басшысы тұрғын үй құрылысының сапасын арттыру мәселесін ерекше бақылауға алып, тұрғындарға сапалы өмір сүру жағдайын қамтамасыз етуді міндеттеді. Тұран ауданындағы «Шымкент қаласының газотехникалық қызметі» мекемесіне барған әкім газбен қамтамасыз ету саласының маңыздылығына тоқталып өтті. Бұл мекеме қала тұрғындарының газ жабдықтарын қауіпсіз пайдалануын қамтамасыз етуге жауапты. Әкім алдағы жылыту маусымында өрт қауіпсіздігін күшейту керектігін және бұл салада жұмыс істеу үлкен жауапкершілікті талап ететінін атап өтті.
Сонымен қатар, әкім «Айқап» шағынауданында кәріз жүйесінің құрылыс жұмыстарын тексеріп, мердігерлерге жұмысты сапалы және уақытылы аяқтау жөнінде тапсырмалар берді. Аралау барысында «Көл» аумағын абаттандыру жобасымен де танысты. Әкім жауапты тұлғаларға спорт және ойын алаңдарын құру бойынша нақты тапсырмалар берді. Жаңа спорт алаңдары қала тұрғындарына, әсіресе балалар мен ересектерге, спортпен шұғылданып, белсенді демалыс өткізуге мүмкіндік жасайтын болады.
Бұл шаралар Шымкент қаласында тұрғындардың өмір сүру сапасын жақсартуға, қаланың инфрақұрылымын дамытып, қауіпсіз әрі жайлы орта қалыптастыруға бағытталған.
