Шымкент қаласында құқықтық сананы арттыру және тұрғындарды жалған ақпараттың жаңа формаларынан қорғау мақсатында Бас прокуратураның Құқықтық статистика және арнайы есепке алу жөніндегі комитетінің Қылмыстық қауіп-қатерлерді болжау орталығы iPhone иелеріне бағытталған интернет-алаяқтықтың күшейгенін хабарлайды.
Соңғы кездері қала тұрғындары Apple компаниясынан келгендей көрінетін жалған SMS және iMessage хаттарды жиі ала бастаған. Бұл хабарламаларда табылған iPhone туралы нақты деректер — моделі, түсі және жады көлемі — әдейі көрсетіліп, азаматты шатастыру, ақпараттың шынайы екеніне сендіру тәсілі ретінде қолданылады. Мұндай әрекеттер — құқықтық сауаттылық деңгейі төмен немесе цифрлық қауіпсіздік талаптарын толық сақтамайтын пайдаланушыларды алдаудың жаңа механизмі.
Хаттағы сілтеме арқылы өткен пайдаланушылар Apple Find My қызметіне өте ұқсас жалған веб-парақшаға тап болады. Нәтижесінде азамат өз Apple ID логині мен паролін алаяқтарға өзі жіберіп қояды. Бұл қылмыскерлерге құрылғының белсендіру блоктауын айналып өтуге, телефонды толық ашуға және оның ішіндегі жеке ақпаратқа қол жеткізуге мүмкіндік береді.
Шымкент қаласында соңғы жылы тіркелген киберқылмыс фактілерінің ішінде фишингтік шабуылдардың үлесі айтарлықтай артқан. Бұл жағдай тұрғындар арасында құқықтық мәдениетті нығайту, цифрлық кеңістікте өзін қорғау дағдыларын дамыту қажеттігін көрсетеді. Жалған ақпаратты тану, әрбір цифрлық әрекетті құқықтық тұрғыдан салмақтай білу — алаяқтықтың алдын алудағы негізгі құрал.
Осыған байланысты қала тұрғындарына төмендегі қауіпсіздік шараларын қатаң сақтау ұсынылады:
- Күмәнді сілтемелерге өтпеу. Ресми хабарламалар ешқашан күдікті сыртқы ресурстарға бағыттауға тырыспайды.
- Жоғалған құрылғы туралы ақпаратты бөлек электронды пошта арқылы көрсету. Бұл негізгі поштаның бұзылу қаупін азайтады.
- SIM-картаны PIN-кодпен қорғау. SIM қолжетімсіз болса, алаяқ құрылғыны тіркей алмайды.
- iPhone-ды тек ресми icloud.com/find сервисі арқылы тексеру. Басқа кез келген парақша жалған болуы мүмкін.
Шымкент қаласының тұрғындарын цифрлық ортада сақ болуға, киберқауіпсіздік мәдениетін арттыруға және құқықтық сананы нығайтуға шақырамыз. Әр азаматтың қырағылығы — киберқылмысқа қарсы қалқан.
Сақ болыңыздар! Цифрлық қауіпсіздік талаптарын сақтап, өз деректеріңізді қорғаңыздар.
