Қоғамның дамуы мен қауіпсіздігі ең алдымен жастардың құқықтық санасы мен тәртіп деңгейіне байланысты. Шымкент қаласында бұл бағыттағы жұмыстар жүйелі түрде жүзеге асырылуда. «Заң мен Тәртіп» тұжырымдамасы аясында жастар арасында құқық бұзушылықтың алдын алу, азаматтық жауапкершілік пен құқықтық мәдениетті қалыптастыру мақсатында түрлі кездесулер, дәрістер мен түсіндіру шаралары өткізілуде.
Шымкент қаласы Полиция департаменті Әл-Фараби аудандық полиция басқармасы қызметкерлері Политехникалық колледж студенттерімен арнайы кездесу ұйымдастырды. Іс-шараға Жергілікті полиция қызметі басқармасы Ювеналдық полиция тобының жауапты мамандары қатысып, жасөспірімдермен ашық диалог форматында әңгіме жүргізді.
Кездесу барысында полицейлер жастарды құқық бұзушылық пен тәртіпсіздікке жол бермеуге, салауатты өмір салтын ұстануға және өз уақытын тиімді пайдалануға шақырды. Олар «жаман әдет – жақсы болашаққа кедергі» екенін атап өтіп, әрбір студенттің өз тағдырына жауапкершілікпен қарауының маңыздылығын түсіндірді.
Сонымен қатар, құқық қорғау органдарының өкілдері жасөспірімдерге қылмыстық және әкімшілік жауапкершілік жасы туралы нақты мәлімет беріп, заңды бұзудың салдары ауыр зардаптарға әкелетінін ескертті. ҚР Қылмыстық кодексінің нормаларына сәйкес, кейбір құқық бұзушылықтар үшін жауапкершілік 14 жастан басталатыны айтылды. Бұл – жастардың заң алдындағы жауапкершілікті ерте түсінуіне бағытталған маңызды ақпарат.
Полицейлердің айтуынша, қазіргі таңда жастар арасындағы құқық бұзушылықтың бір бөлігі әлеуметтік желілер мен интернеттегі теріс ықпалдардың нәтижесінде туындауда. Сондықтан «Құқықтық сана деңгейін арттыру» бастамасы аясында онлайн және офлайн форматта ақпараттық-түсіндіру жұмыстары күшейтілуде. Әлеуметтік желілерде арнайы бейнероликтер мен ақпараттық жазбалар жарияланып, жасөспірімдерге интернет алаяқтық, киберқорқыту, фейк ақпараттардың қаупі туралы түсіндіріледі.
Іс-шара барысында полицейлер жастарды отбасында, оқу орнында және қоғамда үлгілі мінез-құлқымен ерекшеленуге шақырды. Олар адамның өмірі мен денсаулығы, құқықтары мен бостандықтарынан қымбат ештеңе жоқ екенін атап өтті. Қауіпсіз қоғам құру – ел азаматтарының ортақ міндеті, ал заңды сақтау – әрбір адамның борышы.
Шымкент қаласы Полиция департаменті «Заң мен Тәртіп» тұжырымдамасы аясында осындай кездесулерді тұрақты түрде өткізіп келеді. Бұл шаралар құқық бұзушылықтың алдын алу ғана емес, сонымен қатар жастарды патриоттық рухта тәрбиелеу, олардың ел болашағына деген жауапкершілігін арттыру мақсатында ұйымдастырылуда.
Құқықтық санасы жоғары, тәртіпті және белсенді жастар – мемлекеттің тірегі. Шымкент жастарының бойында заңға деген құрметті арттыру, олардың саналы азамат болып қалыптасуына жағдай жасау – құқық қорғау органдары мен қоғамның басты мақсаты.
