Шымкент қаласында «Заң және тәртіп» қағидатын іске асыру және құқықтық сауаттылықты арттыру аясында экстремизм мен терроризмнің алдын алу бағытында кешенді шаралар жалғасуда. Қаланың қауіпсіздігін қамтамасыз ету мақсатында Шымкент қалалық Полиция департаментінің Экстремизмге қарсы іс-қимыл басқармасы Ақпараттық байланыс басқармасы, Күзет қызметін бақылау бөлімі, Ұлттық қауіпсіздік комитетінің Шымкент қаласы бойынша департаменті және қала әкімі аппараты жанындағы терроризмге қарсы күрес жөніндегі комиссия қызметкерлерімен бірлесіп, денсаулық сақтау саласындағы нысандардың басшыларымен арнайы жиын өткізді.
Бұл жиынның негізгі мақсаты – террористік тұрғыдан осал объектілер қатарына жатқызылған медициналық мекемелердің қауіпсіздік деңгейін арттыру, инженерлік-техникалық жарақтандыруды күшейту және ықтимал дағдарыстық жағдайларда жедел әрекет ету жүйесін жетілдіру.
Кездесу барысында көтерілген негізгі мәселелер:
- Денсаулық сақтау мекемелерінің аумағын және ішкі ғимараттарын бейнебақылау жүйелерімен толық қамту;
- Орнатылған камераларды Шымкент қалалық Полиция департаментінің Жедел басқару орталығымен интеграциялау арқылы тәулік бойы бақылауды қамтамасыз ету;
- Күзет қызметінің жұмысын заманауи талаптарға сәйкестендіру;
- Терроризм қаупі кезінде қызметкерлердің іс-әрекет алгоритмін нақтылау;
- Қауіпсіздік жүйелерін тексеру және күшейту бойынша тұрақты мониторинг жүргізу.
Террористік тұрғыдан осал объектілер ретінде денсаулық сақтау мекемелері тек емдеу орындары ғана емес, қоғам өміріндегі маңызды инфрақұрылым нысандары болып табылады. Мұнда адамдардың өмірін сақтап қалуға бағытталған күрделі медициналық қызметтер көрсетіледі. Сондықтан мұндай мекемелердің қауіпсіздігі – тек бір саланың емес, бүкіл қоғамның тұрақтылығы мен қауіпсіздігінің кепілі.
Жиын барысында полиция қызметкерлері мен ұлттық қауіпсіздік мамандары медициналық мекеме басшыларына «Терроризмге қарсы іс-қимыл туралы» заң талаптарын, нысандардың жауапкершілік деңгейін және қауіпсіздік шараларын орындамау салдарын түсіндірді. Әрбір мекеме басшысы өз қызметкерлерін төтенше жағдай кезіндегі әрекет ету жоспарына үйретуге, нысан аумағында күдікті зат немесе белгісіз тұлға анықталған жағдайда дереу құқық қорғау органдарына хабарлауға міндетті екендігі ескертілді.
Сондай-ақ, жиында ақпараттық қауіпсіздік мәселесіне ерекше назар аударылды. Өйткені заманауи жағдайда терроризм қаупі тек физикалық шабуылдармен ғана шектелмей, кибершабуылдар түрінде де көрініс табуы мүмкін. Бұл бағытта медициналық мекемелердің ақпараттық жүйелерін қорғау, құпия деректердің қауіпсіздігін қамтамасыз ету, рұқсатсыз кірудің алдын алу шаралары түсіндірілді.
Шымкент қаласында жүргізіліп жатқан мұндай түсіндіру жұмыстары тек қауіпсіздік деңгейін арттырып қана қоймай, құқықтық мәдениетті нығайтуға да септігін тигізеді. «Заң және тәртіп» қағидатын ұстану – әрбір мекеме басшысы мен қызметкерінің азаматтық борышы. Денсаулық сақтау саласындағы нысандардың қауіпсіздігі қала тұрғындарының сенімі мен тыныштығының маңызды кепілі болып қала береді.
