Медицина – ұлттың саулығы мен ел болашағының тірегі. Бүгінде қазақстандық денсаулық сақтау жүйесі жаңа белестерді бағындырып, әлемдік деңгейде мойындалған жетістіктерге қол жеткізіп отыр. Соның жарқын дәлелі – белгілі хирург, профессор Болатбек Баймахановтың жетекшілігімен жасалған бірегей операция. Бұл – медицина саласындағы ерекше серпіліс қана емес, еліміздің ғылыми әлеуетінің айғағы.
Президент Қасым-Жомарт Тоқаев аталған озық медициналық жетістікке ерекше назар аударып, орталық ұжымына Алғыс хат жолдады. Мемлекет басшысы операцияның еліміз үшін тарихи маңызын атап өтіп, дәрігерлер еңбегіне жоғары баға берді:
«Мемлекет денсаулық сақтау саласын дамытуға баса мән береді. Бұл ретте көптеген іргелі бастама қолға алынып, ауқымды жұмыс атқарылып жатыр. Соның нәтижесінде ұлттық медицина қарқынды дамып келеді. Сіздер жасаған бірегей операция – соның айқын дәлелі. Қазір еліміз өте күрделі трансплантациялық операция жасайтын әлемдегі алты мемлекеттің қатарына кіреді. Бұл жетістікке отандық мамандардың, соның ішінде өздеріңіздің қажырлы еңбектеріңіз бен ерекше білімдеріңіздің, сондай-ақ теңдессіз тәжірибелеріңіздің арқасында жетіп отырмыз. Баршаңызға шынайы ризашылығымды білдіремін. Болашақта да ұлт саулығын жақсарту үшін тынымсыз тер төгіп, халқымызға қалтқысыз қызмет ете бересіздер деп сенемін», – делінген Алғыс хатта.
Отандық медицина тарихындағы бұл айтулы оқиға – тек бір операцияның сәттілігі ғана емес, тұтас жүйенің дамуының айқын көрінісі. Мұндай жетістік – жылдар бойы жинақталған тәжірибе мен тынымсыз еңбектің, ғылым мен практиканың үйлесімді жемісі.
Президенттің өзі атап өткендей, бүгінде Қазақстан әлем бойынша ең күрделі трансплантациялық операцияларды жасайтын санаулы мемлекеттердің қатарында. Бұл – шетелге алаңдамай-ақ, отандық мамандарға сенім артуға толық мүмкіндік береді. Сонымен қатар, болашақ медицина кадрларына жол ашып, еліміздегі медициналық білім мен ғылымның сапасын арттыратыны сөзсіз.
Осындай табыс пен толымды тәжірибе – отандық медицинаның келешегіне деген сенімді нығайтады. Ұлт саулығы жолында тынымсыз тер төгіп жүрген ақ халатты абзал жандарға алғысымыз шексіз!
