Мемлекет басшысы Қасым-Жомарт Тоқаев «Бәйтерек» ұлттық басқарушы холдингі» АҚ басқарма төрағасы Рустам Қарағойшинді қабылдады. Кездесу барысында холдингтің 2023 жылы атқарған жұмыстары мен 2024 жылға арналған жоспарлары таныстырылды. Бұл жайында Ақорданың баспасөз қызметі ресми түрде хабарлады.
Рустам Қарағойшиннің айтуынша, өткен жылы холдинг тарапынан жалпы көлемі 6 триллион теңгеге жуық қаржылық қолдау көрсетілген. Оның 4,1 триллионы ірі, орта және шағын бизнеске бағытталса, 1,9 триллионы тұрғын үй құрылысы секторын қаржыландыруға жұмсалған.
Холдингтің активтері 2023 жылдың қорытындысы бойынша 14,1 триллион теңгеге жетіп, инвестициялық және несие портфелі 10,3 триллион теңгеге дейін ұлғайған. Бұл ретте таза табыс 416 миллиард теңгені құрады. Басқарма төрағасы бұл қаражаттың холдинг құрамындағы компаниялар арқылы түрлі бағдарламаларды жүзеге асыруға жұмсалатынын атап өтті.
Президентке «Даму» кәсіпкерлікті дамыту қоры» базасында екі жаңа кепілдік қоры құрылғаны жайлы ақпарат берілді. Бірі – шағын және орта бизнеске бағытталған, екіншісі – 7 миллиард теңгеден асатын ірі жобаларды қаржыландыру мақсатында іске қосылған.
Сонымен қатар, шетелдік серіктестермен бірлескен инвестициялық қорлар құру арқылы ауыл шаруашылығы, өңдеу өнеркәсібі мен тау-кен металлургиясы салаларында тікелей инвестиция тарту бастамалары ұсынылды. Бұл қорлар «Астана» халықаралық қаржы орталығының юрисдикциясында жұмыс істейді.
Қасым-Жомарт Тоқаев еліміздің орнықты экономикалық дамуы үшін қолға алынған бастамалардың маңыздылығын атап өтіп, «Бәйтерек» холдингіне бірқатар нақты тапсырма жүктеді. Атап айтқанда, екінші деңгейлі банктермен бірлесіп, нақты секторды қаржыландыру, сондай-ақ Энергетикалық және коммуналдық секторларды жаңғырту жөніндегі ұлттық жобаларды жүзеге асыру үшін қосымша қаржы тарту қажеттігіне назар аударды.
Мемлекет басшысы алға қойылған міндеттерді сапалы әрі тиімді орындау – ел дамуы үшін аса маңызды екенін баса айтты.
