Әлем назарын өзіне аударған тарихи жәдігер – «Титаник» апатынан аман қалған жолаушының қолымен жазылған хаты Ұлыбританиядағы аукционда рекордтық бағаға сатылды. Полковник Арчибальд Грейстің 1912 жылдың 10 сәуірінде әйгілі кемеге алғаш мінген күні жазған хаты 400 мың АҚШ долларына өтті.
Тарихи хатта Грейс «Титаниктің» таңғажайып сәулеті мен салтанатты көрінісі туралы алғашқы әсерлерін егжей-тегжейлі сипаттаған. Алып лайнерге деген таңданысын жеткізген бұл жазба — сол заманның куәгерлік естелігі ретінде ерекше құнды.
Аукционды ұйымдастырушылардың айтуынша, хат бастапқы бағасынан бес есе қымбатқа сатылған. Бұл — «Титаник» кемесімен байланысты жазылған хаттардың ішіндегі ең қымбат сауда нәтижесі болып отыр. Бұған дейін дәл осындай деңгейде бағаланған хат тіркелмеген.
Арчибальд Грейс — «Титаник» апатынан аман қалған санаулы жолаушылардың бірі. Ол өз естеліктерінде кеменің суға батып бара жатқан сәтін және жолаушылардың жан ұшыра қашқан көрінісін егжей-тегжейлі сипаттаған болатын. Бұл хат сол оқиғаның басталуындағы бейбіт әрі жарқын көріністердің соңғы куәгерлік дәлелі ретінде бағаланып отыр.
Аукцион өкілдері тарихи құжаттың жаңа иесі кім екенін құпия ұстауда. Дегенмен олар бұл жәдігердің мұражайға қойылып, көпшілікке қолжетімді болуы мүмкін екенін айтты.
1912 жылдың сәуірінде орын алған «Титаник» апаты әлем тарихындағы ең қайғылы теңіз трагедияларының бірі саналады. Кеме батып кеткен түнде 1 500-ден астам адам қаза тапқан еді. Сол себепті «Титаникпен» байланысты әрбір жәдігер тарих пен адам тағдырының үнсіз куәгері ретінде жоғары бағаланады.
