Қазақстанның өңдеу өнеркәсібіндегі маңызды салалардың бірі – машина жасау секторы жыл өткен сайын айтарлықтай даму үстінде. Соңғы бес жылда бұл саладағы үлес 13 пайыздан 19 пайызға дейін өсіп, былтыр өндіріс көлемі 4,6 триллион теңгеге жетті. Бұл – отандық өндірістің әлеуеті артып келе жатқанын көрсететін маңызды көрсеткіш.
Салада жаңа өнім түрлері шығарылып, тауар экспорты да қарқын ала бастады. Қазақстан нарығына ауыл шаруашылығына арналған техникалардан бастап, автобустар мен жеңіл, жүк көліктерін құрастыратын шетелдік компаниялар келіп, өз өндірістерін іске қосты. Биыл елімізде әлемдік деңгейдегі жоғары технологиялы кәсіпорындар іске қосылады деп жоспарланған. Бұл – мемлекеттің отандық өндірісті қолдау бағытындағы жүйелі жұмысының нақты нәтижесі.
2024 жылдың қорытындысы бойынша машина жасау өндірісінің көлемі 10 пайызға өссе, биылғы I тоқсанның өзінде бұл көрсеткіш 17 пайыздан асып отыр. Бұл – саладағы оң өзгерістер мен қабылданып жатқан шаралардың тиімділігін айқындайтын дерек.
Осы жетістіктер Қазақстан машина жасаушыларының XII форумында кеңінен талқыланды. Елордалық жиынға бизнес өкілдері, салалық мамандар мен инвесторлар жиналып, тәжірибе алмасып, ұсыныстар әзірледі. Форумға ҚР Премьер-министрі Олжас Бектенов арнайы қатысып, Мемлекет басшысы Қасым-Жомарт Тоқаевтың құттықтауын жеткізді.
Бүгінгі таңда машина жасау саласы бүкіл ұлттық экономиканы дамытуда жетекші бағыттардың бірі ретінде қарастырылып отыр. Сарапшылардың айтуынша, бұл салада қабылданған саясат пен халықаралық әріптестікті кеңейту алдағы жылдары да өндіріс қарқынын сақтап қалуға мүмкіндік береді.
