АҚШ-тың Қорғаныс министрі, Пентагон басшысы Пит Хегсет мемлекеттік құпияны жария етті деген күдікпен қоғам назарында сынға ұшырады. New York Times басылымының мәліметінше, Хегсет Йемендегі әскери операция туралы аса құпия ақпаратты отбасылық чатта таратқан.
Хегсеттің жеке смартфоны арқылы «Signal» мессенджерінде ашылған топтық чатта әйелі, ағасы және жеке заңгері болған. Олардың барлығы мемлекеттік құпия болып саналатын мәліметпен танысқан. Бұл әрекет АҚШ-тың ұлттық қауіпсіздік талаптарына қайшы келіп отыр.
Айта кету керек, бұл оқиға осымен шектелмейді. Бұған дейін Ақ үй әкімшілігінің шенеуніктері де абайсызда құпия чатқа «The Atlantic» журналының редакторын қосып жіберіп, Йемендегі хуситтерге қарсы әскери операция басталғаны туралы ақпараттың сыртқа таралуына жол берген болатын.
Мамандардың айтуынша, мұндай жауапсыздық пен салғырттық мемлекет үшін стратегиялық қауіп тудыруы мүмкін. АҚШ Қорғаныс министрлігінің ішінде де бұл жағдайға байланысты тексеру жұмыстары басталып, Пит Хегсетке қызметтік тергеу жүргізіліп жатыр.
Йемендегі жағдай ушығып тұрған шақта мұндай ақпараттың сыртқа шығуы АҚШ-тың одақтастары мен қарсыластары арасында сенімсіздік туғызуы ықтимал. Әскери операцияның нақты уақыты мен мақсаты секілді мәліметтердің жария болуы соғыс тактикасына да әсер етуі мүмкін.
Халықаралық қауіпсіздік саласындағы сарапшылар бұл жағдайды үлкен мемлекеттік қателік ретінде бағалап отыр. Олар Пентагон мен Ақ үй арасындағы ақпарат алмасу тетіктерін қайта қарап, күшейту қажеттігін алға тартуда.
