Шымкент қаласында жолаушыларды тасымалдау қызметі қарқынды түрде дамуда. Бүгінгі күні қалада 80 бағыт бойынша 947 автобус жолаушыларды күнделікті тасымалдап келеді, ал бұл маршруттарды 11 көлік компаниясы қамтамасыз етеді. Қала бойынша жалпы автобус саны 1150-ге жетті. Оның ішінде 44 автобус 3 жылға дейінгі, 1090 автобус 5 жылға дейінгі, ал 7 жылдан асқан көлік саны бар-жоғы 16 ғана.
Қоғамдық көліктердің барлығы GPS трекерлерімен жабдықталған, бұл жүйе қызмет сапасын бақылауды жақсартып, көліктердің қозғалысын тиімді қадағалауға мүмкіндік береді. Сонымен қатар, қаланың автопаркінде 615 автобус сығымдалған газ-метанмен жұмыс істесе, 535 автобус дизель отынын пайдаланады. Қаладағы көлік инфрақұрылымын жақсарту мақсатында екі газ толтыру станциясы қызмет көрсетуде, ал жыл соңына дейін «Shymkent Bus» автопаркінде үшінші газ станциясы іске қосылмақ. Бұл жаңашылдық қаладағы газбен қамту мәселесін шешеді деп күтілуде.
Әлеуметтік маңызы бар бағыттарға да ерекше назар аударылған. 77 маршрут осы санатқа кіріп, оларды субсидиялау мақсатында жергілікті бюджеттен 33,2 млрд теңге бөлінді. Сонымен қатар, биыл көлік компаниялары автопарктерін жаңартып, 19 жаңа автобус сатып алынды. «Shymkent Bus» 200 жаңа автобус алуға «Өндірістік даму қоры» АҚ-нан мақұлдау алған болатын. Жыл соңына дейін кезең-кезеңімен 100 автобус жеткізіледі деп жоспарлануда. Қала тұрғындары үшін маңызды жаңалықтардың бірі – 2024 жылдан бастап Шымкент қаласының қоғамдық көліктерінде қолма-қол төлем қабылдау жүйесі толығымен жойылып, тек электронды төлем жүйесі қолданылады. Бұл өзгеріс жолаушылардың қауіпсіздігін арттыруға бағытталған маңызды қадам, себебі жүргізушілердің назарын ақша жинауға бөлмей, жол қозғалысына толық аудару жоспарланған.
2024 жылдың алғашқы 9 айында Шымкент қаласының қоғамдық көлігіне қатысты «І-Көмек» орталығына және қала әкімінің ресми парақшасына 12 мыңнан астам шағым түскен. Оның ішінде 6 мыңнан аса шағым жүргізушілерге қатысты болса, олардың 3 351-і жолаушыларды қолма-қол төлем жасауға мәжбүрлеуге байланысты тіркелген.
Бұл реформалар мен жаңашылдықтар Шымкент тұрғындары үшін қоғамдық көлік қызметін жақсартуға бағытталған, сонымен қатар жолаушылардың қауіпсіздігін қамтамасыз ету және жол-көлік оқиғаларын азайту мақсатында қолға алынуда.
