Шымкентте қала тұрғындарының өтініштері ескеріліп, қалада бірқатар автобус бағыттарына қосымша көлік құралдары енгізілді. Бұл өзгерістер автобустардың аралық интервалын қысқартып, жолаушылардың қоғамдық көліктерді ұзақ күтпеуіне мүмкіндік берді.
№16, №108, №61, №171, №180, №191 маршруттарға қосымша 12 автобус қосылды. Осылайша, қоғамдық көліктердің қозғалысы жолаушылардың қажеттіліктеріне сәйкес тиімді ұйымдастырылды. №16 автобус маршрутына 276-орамдағы жолаушылар санының артуына байланысты қосымша 2 кесте қосылып, қазіргі уақытта 10 автобус 15 минуттық интервалмен қатынап жүр. №108 автобус маршрутына Шымсити шағынауданынан Күншығыс шағынауданына дейін қызмет көрсететін 10 автобусқа қосымша 2 кесте қосылды. Енді 12 автобус 15 минуттық жиілікпен қатынауда. №61 автобус маршруты Нұршуақ шағынауданында жолаушылар ағынының артуына байланысты 2 қосымша кестемен толықтырылды. Қазіргі таңда 14 автобус 13 минуттық интервалмен жолаушыларға қызмет көрсетеді.
№171 бағытындағы автобустар Бозарық шағынауданынан әскери комиссариатқа дейін жүреді. Бұрын бұл бағытта 10 автобус болса, жолаушылар ағынының артуына байланысты қосымша 2 кесте енгізіліп, қазір 12 автобус 12 минуттық жиілікпен қатынап жүр. №180 бағытындағы автобустар Көкбұлақ тұрғын алабы мен Гүлжан аялдамасы арасында қызмет көрсетеді. Бұрын бұл бағытта 8 автобус болса, қазір қосымша 2 кесте енгізіліп, 10 автобус 15 минуттық жиілікпен қатынауда. №191 бағытындағы автобустар Қарабастау тұрғын алабы мен Б.Момышұлы көшесі арасында қатынайды. Жолаушылар санының артуына байланысты қосымша 2 кесте қосылып, қазіргі таңда 10 автобус 15 минуттық интервалмен жұмыс істейді.
Бұл шаралар Шымкент қаласының қоғамдық көлігін тиімдірек етіп, жолаушылар үшін қолайлы жағдай жасауды мақсат етеді.
