2024 жылдың наурыз айынан бастап Қазақстан азаматтары мен ел аумағында тұратын шетелдіктер үшін eGov mobile қосымшасы арқылы құмар ойындарға қатысуды өз еркімен шектеу мүмкіндігі пайда болды. Қолданушылар 6 айдан 12 айға дейінгі мерзімге өтініш беру арқылы құмар ойындарға қатысуын шектей алады. Қазіргі таңда бұл қызметті 110 мыңнан астам адам пайдаланып үлгерген, оның ішінде жастар мен оқушылар саны айтарлықтай көп, бұл лудоманияға қарсы күресте тиімді құрал болып саналады.
Сонымен қатар, букмекерлік кеңселер мен тотализаторлардың жарнамаларына қатысты қатаң шектеулер енгізілді. Қалалық аумақтарда сыртқы жарнама, көлік құралдарындағы жарнамалар, сондай-ақ БАҚ, кино және видео қызмет көрсету орындарында бұл бизнесті жарнамалауға тыйым салынды.
Дүниежүзілік денсаулық сақтау ұйымы (ДДСҰ) лудоманияны патологиялық тәуелділік ретінде мойындаған. Қазақстанда құмар ойындарға тәуелділердің саны шамамен 350 000-ға жетеді, олардың арасында жасөспірімдер көптеп кездеседі. Осы мәселені шешу мақсатында Қазақстанда азаматтар мен резиденттер үшін құмар ойындарға қатысудан өзін-өзі шектеу қызметі автоматтандырылды. Бұл жаңа жүйе лудоманиямен күресуде маңызды қадам болып табылады және қоғамдағы құмар ойындарға тәуелділікті азайтуға мүмкіндік береді. Құмар ойындардан өзін-өзі қорғаудың бұл механизмі көптеген адамдарға тәуелділіктен құтылып, салауатты өмір салтын ұстануға көмектеседі.
Заңсыз ойын бизнесімен күреске азаматтардың белсенді қатысуы да маңызды рөл атқарады. Экономикалық тергеп-тексеру департаменті халықты заңсыз ойын автоматтары туралы ақпарат беруге шақыруда. Қоғамның бұл мәселеге әлеуметтік жауапкершілікпен қарауы лудоманияның алдын алу үшін маңызды. Егер заңсыз ойын аппараттары туралы ақпарат болса, Департаменттің сенім телефонына хабарласу қажет: +7 (7252) 77-14-48. Бұл шаралар құмар ойындардың зиянды әсерінен балалар мен жастарды қорғауға және қоғамды қауіпсіз етуге бағытталған.
