Шымкент қаласындағы №2 медициналық оңалту орталығы сал ауруына шалдыққан балаларды оңалтуда жоғары нәтижелер көрсетуде. Церебралды сал ауруы және тірек-қимыл жүйесінің бұзылыстарымен ауыратын балалар орталықта оңалту емдерін алып, алғашқы қадамдарын жасауға қол жеткізуде. Бұл дәрігерлердің қажырлы еңбегі мен ата-аналардың шыдамдылығының арқасында мүмкін болып отыр.
Сондай-ақ, Шымкентте жыл басынан бері медициналық сақтандыру жүйесі арқылы 1000-нан астам оңалту қызметі көрсетілген. Оңалту емдерін алғандардың бірі – Дильноза Хамидованың қызы. Ол 1 жас 2 айында орталықта оңалтудан өтіп, алғашқы қадамын дәл осы жерде жасаған. Бүгінгі таңда қыз бала 10 жасқа толып, әлеуметтік ортаға бейімделген.
Орталықта 18 жасқа дейінгі балаларға неврологиялық, кардиохирургиялық, ортопедиялық ақаулар бойынша оңалту шаралары ұсынылады. Орталық заманауи құралдармен жабдықталған және физиотерапия, массаж, логопед, дефектолог, психолог, кардиолог сынды мамандардың қызметін ұсынады. Ерекше назар аударатын жайт – 3 жасқа дейінгі балаларға арналған ерте араласу бөлімшесінің болуы.
Шымкентте жалпы 72 медициналық мекеме науқастарға оңалту қызметтерін ұсынады. Олар кардиологиялық, ортопедиялық, неврологиялық және басқа да бағыттарда ем-дом жүргізеді. Әлеуметтік медициналық сақтандыру қорының (ӘМСҚ) Шымкент қаласы бойынша филиалының мәліметі бойынша, жыл басынан бері 8000-ға жуық оңалту шаралары жүзеге асырылған. Бұл қызметтердің 3000-нан астамы балаларға арналған. Оңалту қызметтері міндетті әлеуметтік медициналық сақтандыру жүйесі аясында ұсынылып, балалардың денсаулығын қалпына келтіруге және өмір сапасын жақсартуға бағытталған.
