Президент Қасым-Жомарт Тоқаев Катар Әмірі шейх Тамим бен Хамад Әл Тәнимен телефон арқылы сөйлесті.
Әңгіме басында мемлекеттер басшылары бірін бірі қасиетті Рамазан айының басталуымен құттықтады. Көшбасшылар Қазақстан мен Катар арасындағы ынтымақтастықтың қазіргі жағдайын талқылап, оны одан әрі қарай дамытудың қолайлы перспективалары бар екенін атап өтті.
Тараптар өзара сауда-саттықтың оң қарқынын одан әрі сақтауға және инвестициялық жобаларды, соның ішінде банк және қаржы салаларындағы жобаларды жүзеге асыруға ниетті екенін нақтылады.
Қазақстан Президенті Катардың жетекші бизнес өкілдерін экономиканың басты салаларындағы бірлескен жобаларды іске асыруға белсене атсалысуға шақырды.
Катар Әмірі көп жақты ынтымақтастықты одан әрі кеңейтуге дайын екенін айтып, осы бағытта нақты шаралар қабылдау қажеттігін атап өтті. Шейх Тамим бен Хамад Әл Тәни Қазақстанға жасайтын мемлекеттік сапарын дайындау үшін ресми өкілдерін жіберуге ниетті екенін жеткізді.
