Биыл шаруалар жемшөп дақылдарын егуге басымдық береді. Ал бидай алқаптары керісінше азайтылады.
Ауыл шаруашылығы министрінің орынбасары Айдарбек Сапаровтың айтуынша, мұндай шешім елдегі жемшөп тапшылығының алдын алмақ. Суды көп талап ететін күріш пен мақта егістерін қысқарту да жоспарда бар. Үкімет басшысы жауапты ведомстволарға диқаншыларды қажетті дақылдармен қамтамасыз етуді тапсырды. Сондай-ақ биыл оларды қолдауға бағытталған қаражат көлемі артқанын мәлімдеді.
Әлихан Смайылов, ҚР премьер-министрі: – Мемлекет биыл егістік және оны жинау жұмыстарына өткен жылға қарағанда екі есе көп, барлығы 220 миллиард теңгеден астам қаржы бөліп отыр. Сонымен қатар тыңайтқыштар мен пестицидтерді сатып алу құнының 50 процентін субсидиялау әрі қарай жалғасады. АШМ әкімдіктермен бірлесіп, әлеуметтік маңызы бар дақылдар мен жемшөпті жеткілікті көлемде егуді қамтамасыз етсін. Өткен жылы еліміздің кейбір аймақтарында жемшөппен қамтамасыз ету бойынша проблемалар болғанын білеміз. Биыл бұл жағдай қайталанбауы тиіс.
https://24.kz/kz/zha-aly-tar/o-am/item/532561-sharualar-zhem-sh-p-eguge-basymdy-beredi
