Елдегі саяси өзгерістер тек құжат жүзінде ғана емес, халықтың санасында және күнделікті өмірінде көрініс табуы тиіс. Осы ұстанымды ту еткен Қазақстан Халық партиясының Шымкент қалалық филиалы кезекті жиынын өткізді. Бұл басқосу ел болашағын айқындайтын реформаларды іске асырудың нақты іс-қимыл алаңына айналды.
Жиынның беташары саяси реформалардың мән-мағынасын талқылаудан басталды. Сөз алған белсенділер мен саясаттанушылар бүгінгі қоғамның басты талабы – биліктің халық алдындағы есептілігі екенін баса айтты. Олардың пайымдауынша, мемлекеттік аппараттың ашық жұмыс істеуі – әлеуметтік әділетсіздікті жоюдың басты құралы.
«Егер билік институты халықтың бақылауында болса, жемқорлыққа орын қалмайды. Әлеуметтік теңсіздік азайып, әрбір азамат мемлекеттің қамқорлығын сезінеді. Біз ұсынып отырған реформалардың түпкі мақсаты да осы», – деді жиында сөйлеген партия өкілдері. Бұл пікір қатысушылар тарапынан толық қолдау тауып, жаңа саяси мәдениеттің негізі ретінде қарастырылды.
Жиынның екінші бөлімі практикалық сипат алып, партиялық құрылымдардың жұмысын ширатуға арналды. Филиал жетекшілері реформаларды жүзеге асыру кезеңінде әрбір партия мүшесі «бақылаушы» емес, «белсенді қатысушы» болуы керектігін ескертті.
Осы орайда, партиялық инфрақұрылымның әлеуетін тиімді пайдалану мәселесі сөз болды.
Шымкенттік партиялықтар бұл жолы жұмыс әдісін түбегейлі өзгертпек. Ақпараттық-түсіндіру жұмыстары бұдан былай тек жылы кабинеттерде немесе ресми залдарда өтпейді. Арнайы құрылған үгіт-насихат топтары қаланың ең шеткі аймақтарына, ірі өндірістік кәсіпорындарға, білім беру және денсаулық сақтау мекемелеріне барады.
«Біздің мақсатымыз – реформаның пайдасын әрбір еңбек адамына қарапайым тілмен жеткізу. Халық өзінің дауысы мен белсенді қатысуы арқылы мемлекеттің болашағын қалай өзгерте алатынын сезінуі тиіс. Әрбір азамат өзін өзгерістердің авторы ретінде сезінгенде ғана реформа табысты болады», – деп түйіндеді жиынды ұйымдастырушылар.
Шымкентте өткен бұл іс-шара Қазақстан Халық партиясының саяси сахнадағы орны бөлек екенін тағы бір дәлелдеді. Партия мүшелері тек билік пен халық арасындағы «алтын көпір» ғана емес, елдегі демократиялық процестердің негізгі қозғаушы күшіне айналып отыр.
Ата Заңдағы жаңашылдықтар – ел дамуының берік іргетасы болса, партиялық белсенділік – сол іргетастың үстіне салынған еңселі үйдің қабырғасы іспеттес. Кездесу соңында қатысушылар ортақ мақсат жолында жұмыла жұмыс істеуге уағдаласты.
