Бүгінгі қоғам алдында тұрған маңызды міндеттердің бірі – балалар мен жасөспірімдердің құқықтық мәдениетін қалыптастыру, олардың арасындағы құқық бұзушылықтың алдын алу және қылмыс деңгейін төмендету. Себебі, жасөспірімдердің дұрыс жолдан тайып, теріс әдетке бой алдыруы тек жеке өміріне ғана емес, жалпы қоғамның болашағына кері әсерін тигізеді. Осыған байланысты Шымкент қаласында жастардың құқықтық санасын арттыру бағытында жүйелі түрде түрлі іс-шаралар өткізілуде.
Солардың бірі ретінде Қаратау ауданындағы №130 мектепте ұйымдастырылған кездесуді атап өтуге болады. Шымкент қаласы полиция департаментінің қызметкерлері жоғары сынып оқушыларымен жүздесіп, құқықтық тәрбие, заңға құрметпен қарау және салауатты өмір салтын ұстану жайлы жан-жақты түсіндірді.
Іс-шараға Шымкент қаласы полиция департаменті Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі, полиция майоры Бауыржан Карбеков және Есірткі құқық бұзушылығының профилактикасы жөніндегі кеңес мүшесі Бахадыр Бекарыс қатысты. Мамандар оқушылармен ашық әңгіме жүргізіп, құқық бұзушылықтың алдын алу мәселесіне ерекше тоқталды.
Кездесу барысында жастарға қылмыстық жауапкершілік жасы және заңға қайшы әрекеттердің ауыр салдары түсіндірілді. Әсіресе, кәмелетке толмағандардың жасаған құқық бұзушылықтары олардың болашағына қалай теріс әсер ететіні нақты мысалдар арқылы жеткізілді. Құқық қорғау органдарының өкілдері оқушыларды мектеп қабырғасынан бастап үлгілі тәртіпке, білімге құштарлыққа, қоғам алдындағы жауапкершілікті сезінуге шақырды.
Сонымен қатар, мамандар жасөспірімдердің бос уақытын тиімді пайдалану қажеттілігіне назар аударды. Спортпен шұғылдану, өнер мен мәдениетке қызығушылық таныту, жаңа дағдыларды үйрену – олардың жан-жақты дамуына ықпал ететіні айтылды. Бұған қоса, жаман әдеттерден аулақ болып, салауатты өмір салтын қалыптастырудың маңызы ерекше аталды.
Кездесу соңында полиция қызметкерлері адамның өмірі мен денсаулығынан, құқықтары мен бостандығынан асқан қымбат дүние жоқ екендігін ерекше атап өтті. Қауіпсіз қоғам құру тек құқық қорғау органдарының ғана емес, әрбір азаматтың міндеті екендігіне назар аударылды.
Осындай кездесулер жасөспірімдердің құқықтық санасын арттыруға, олардың теріс жолға түспей, елге адал қызмет ететін саналы азамат болып қалыптасуына ықпал етпек. Шымкент қаласында алдағы уақытта да бұл бағыттағы жұмыстар жүйелі түрде жалғасын табатын болады.
