«QazaqGaz Aimaq» АҚ-ның апаттық-диспетчерлік қызметінің слесарі Ермахан Манқараев Шымкент қаласында нағыз ерлік көрсетті. Оның жылдам әрекеті мен кәсібилігінің арқасында екі баласы бар бір отбасы көмірқышқыл газынан уланып, ажалдан аман қалды.
Бұл оқиға көпқабатты үйлердің бірінде орын алған. Ермахан жоспарлы газ құрылғыларын тексеру барысында пәтерлердің бірінен әлсіз дауыстар естиді. Тұрғындар жауап бермеген соң, жағдайды анықтау үшін әрекетке көшеді.
Үй иесінің көмегімен есік ашылғанда, Ермахан ес-түссіз жатқан отбасы мүшелерін көреді. Бұл пәтерді Астанадан келген Жүнісовтер отбасы жалдап тұрған екен. Оқиғаға себеп – газ құрылғысының дұрыс жұмыс істемеуі. Улы газ пәтер ішін толтырып, отбасы мүшелерін есінен тандырған.
Ермахан бірден газ құрылғыларын өшіріп, терезелерді ашып, бөлмедегі ауаны тазартуға кіріседі. Ол бұл жағдайдың қаншалықты қауіпті екенін біліп, жылдам әрекет етеді. Сонымен қатар, жедел жәрдем шақырып, алғашқы медициналық көмек көрсетуді де ұмытпайды.
Дәрігерлердің айтуынша, отбасы көмірқышқыл газынан қатты уланыпты. Ермаханның жедел әрекеті мен кәсіби біліктілігінің арқасында олар аман қалды. Отбасы ауруханаға жеткізіліп, қажетті ем-дом шаралары қабылданды.
Ермаханның бұл әрекеті кездейсоқтық емес. Оның алғашқы медициналық көмек көрсету дағдылары QazaqGaz Aimaq компаниясындағы міндетті оқу-жаттығулар кезінде қалыптасқан. Компания қызметкерлері мұндай жағдайларда қандай әрекет жасау керектігін егжей-тегжейлі меңгереді.
Ермаханның оқиға орнында көрсеткен шеберлігі мен кәсібилігі оның жұмысына деген жауапкершілігін, сондай-ақ, адам өмірін сақтап қалудағы жоғары деңгейдегі даярлығын дәлелдейді. Бұл тек бір отбасының ғана емес, бүкіл қоғамның алдындағы азаматтық борышын терең түсінген қызметкердің ерлігі деп айтуға болады.
Мұндай оқиғалар өміріміздің бағасын еске салып, жауапкершіліктің қаншалықты маңызды екенін көрсетеді. Ермаханның ерлігі тек Жүнісовтер отбасын ғана емес, күллі қоғамды таңқалдырды. Қарапайым қызметкердің осындай әрекеті өзгелерге үлгі болары анық.
