Мемлекет басшысы Қасым-Жомарт Тоқаев Қазақстанда спорт саласын жүйелі дамытуға бағытталған маңызды Заңға қол қойды. Бұл жөнінде Ақорданың ресми сайтында хабарланды.
Құжаттың толық атауы – «Қазақстан Республикасының кейбір заңнамалық актілеріне дене шынықтыру және спорт, сондай-ақ артық заңнамалық регламенттеуді болдырмау мәселелері бойынша өзгерістер мен толықтырулар енгізу туралы» Заң.
Заң нені көздейді?
Жаңа заң спорт саласындағы басқару мен қаржыландыру жүйесін жетілдіруді, ұлттық мүддеге сай спортшыларды тәрбиелеуді және мемлекеттік қолдаудың тиімділігін арттыруды мақсат етеді.
Басым спорт түрлері анықталады
Уәкілетті орган енді еліміздің және өңірлердің басым спорт түрлерінің тізімін әзірлейді. Бұл тізім Олимпиада, Паралимпиада, Сурдлимпиада, Азия және Паразия ойындарындағы спорт түрлеріне, сондай-ақ ұлттық спортқа негізделеді.
Бұл спорт түрлері болашақта мемлекет тарапынан қаржыландырылып, халықаралық жарыстарда ел намысын қорғауға бағытталады.
Федерацияларды екіге бөлу ұсынылды
Федерациялар ұлттық және жергілікті деңгейге бөлініп, аккредитациялау жүйесі жаңартылады. Бұл жаңашылдық спорт ұйымдары арасындағы жауапкершілікті нақтылап, тиімділікті арттыруға мүмкіндік береді.
Легионерлерге бюджет есебінен қаржы бөлінбейді
Заңға сәйкес, бұдан былай шетелдік легионерлерге мемлекет пен квазимемлекеттік сектор қаражаты есебінен төлем жасауға тыйым салынады. Бұл қадам отандық спортшыларға қолдау көрсетуге бағытталған.
Бюджет қаржысы нақты төрт бағытқа бөлінеді
Жоғары жетістіктер спорты (басым спорт түрлері де осыған кіреді);
Мемлекеттік спорт ұйымдарының қызметі;
Бұқаралық спорт;
Спорт инфрақұрылымын дамыту.
Ұлттық стандарттар енгізіледі
Заңда алғаш рет «спорттық даярлықтың ұлттық стандарттары» ұғымы енгізіліп отыр. Бұл – спортшыларды ұлттық дәстүр мен рухани құндылықтарға негізделіп тәрбиелеудің жаңа кезеңі.
Допингке қарсы шаралар күшейтіледі
Уәкілетті органға допингке қатысты ережелерді бұзғандарға шара қолдану құзыреті беріледі. Бұл – таза спорт пен әділ сайысты қамтамасыз етуге бағытталған маңызды өзгеріс.
Президент қол қойған жаңа заң – Қазақстан спортын сапалық тұрғыдан жаңа деңгейге көтеруге жасалған нақты әрі жүйелі қадам. Мемлекет енді спортты тек нәтиже арқылы емес, әділдік, ашықтық және ұлттық құндылықтар арқылы дамытпақ.
