Қазақстан 2025 жылы индустриалды даму қарқынын арттырып, 190 жаңа жобаны жүзеге асыруды жоспарлап отыр. Бұл – соңғы бес жылдағы ең ірі индустриялық серпіліс. Жалпы құны 1,5 трлн теңге болатын бұл жобалар ел экономикасына жаңа серпін беріп, 20 мыңнан астам жұмыс орнын ашады.
Жаңа өндірістер мен дамудың жаңа кезеңі
Өңдеу өнеркәсібіндегі негізгі жобалар химия, металлургия, машина жасау және құрылыс материалдары өндірісіне бағытталады. Қазақстанда сутегі пероксиді, сұйық шыны, күкірт қышқылы, минералды тыңайтқыштар, полипропилен және сары фосфор өндірісі кеңейтіліп, химия саласы жаңа деңгейге көтеріледі.
Металлургия саласында да серпіліс күтілуде. «Qaragandy Power Silicon» және «Ekibastuz FerroAlloys» зауыттары ферроқорытпа өндірісін арттырып, Қазақстанды өңірдегі жетекші өндірушілердің біріне айналдыруға үлес қосады.
Жоғары технологиялық жобалар және инвестициялар
Үкімет 6 трлн теңге инвестиция тартып, 12 мың жаңа жұмыс орнын ашуды көздеп отыр. 2025-2035 жылдары Қазақстанда металлургия, машина жасау және химия өнеркәсібінде 9 ірі жоба жүзеге асырылады. Бұл жобалар толық қуатына жеткенде ел экономикасына жылына 7,3 млрд доллар кіріс әкелмек.
Жаңа өндірістердің іске қосылуы Қазақстанның өнеркәсіптік әлеуетін арттырып, халықаралық нарықтағы бәсекеге қабілеттілігін күшейтеді.
